Transvers / Coronal / Sagittal Nədir?

İnsan bədəni şaquli vəziyyətdə, qollar aşağı sallanmış və ovuclar önə baxan vəziyyətdə təsvir edilir. Buna anatomik pozisiya deyilir. Ayrı-ayrı üzvlərin, sümüklərin vəziyyətini və yerləşməsini düzgün təsvir etmək üçün bir neçə səthdən istifadə olunur. 

Transvers (horizontal) səth – yer səthinə paralel gedərək bədəni yuxarı və aşağı şöbələrə bölür. Bu eyni zamanda frontal və sagittal səthlərə perpendikulyar olaraq keçirilən səthə deyilir.

Coronal (frontal) səth – alına paralel gedərək bədəni ön və arxa şöbələrə bölür və sagittal səthə perpendikulyar olan şaquli səthə deyilir.

Sagittal səth – bədən arxaya doğru gedərək bədəni sağ və sol şöbələrə bölür.

Orta (medial) səth – öndən arxaya doğru gedərək bədəni simmetrik olaraq sağ və sol şöbələrə bölür.

Beləliklə aydın olur ki, bədəndən bir orta səth keçirmək mümkün olduğu halda, istənilən qədər sagittal səth keçirmək olar. Məlum olur ki, frontal və sagittal səthlər eyni zamanda şaqulidir.

Hər bir üzvün vəziyyəti (səthləri) yuxarıda təsvir olunan səthlərə müvafiq təyin olunur.

Qaynaq: Əliyev Ə.H., Məhərrəmov Ş.A., Əliyeva F.Ə., İnsan anatomiyası. Bakı: "Bakı Universiteti" nəşriyyatı, 2007, 5-6 s.